Plan B

雞髀仔滿月喇


意識流紀事一則:

話咁快又滿月喇……至奇。我諗所有家長都要接受,頭幾個月最難頂,好難先捱倒一個月。

雞髀仔有乜問題?冇乜,咪就係不停食同不食嘔奶,嘔完餓返又食得好急又多氣又嘔過又食過咁jima,未出院醫生見佢口鼻噴奶以為佢中菌入要入加護,咁就嘔咗亞媽一皮嘢。好彩無事出院,但最長果個cycle食咗7粒鐘,兩轉人奶3轉奶粉,果日好似係返屋企頭幾日。我放自己個樣條片上面書,人哋以為係靈異錄像tim。直到今日佢仍然係鼻塞食得急,但又慢,一樽5安奶可以食兩粒鐘未計掃風,人肉「浪」衫架式掃完風兼繼續坐直半粒鐘後,仲可以瞓兩粒鐘醒完再少量回吐。然後唔知定以為一定要出世盡早去母嬰健康院,一去到果個「羅湖商業城」就中咗少少傷風感冒菌,算,打針覆診都係返仁安算。

隻B出世時有6磅幾2,濕立立脹卜卜好肉酸,之後收水要10日先重返原本咁,嬰院要跟進我餵人奶進度但我都冇返去,不過仁安兒科鄭恩華醫生又冇話佢磅數有咩問題。要記住鄭醫生對冇問題o既事唔會主動提起,所以如果要問嘢要事先度定。例如返到婆婆度坐月,婆婆長期用臭丸,我都要自己睇返report先confirm個仔冇G6PD。

生咗B我發覺我冇特別鍾意BB,I mean,睇書話由hormones影響第3日開始就會母愛爆發同催乳。自己又唔係好覺,唔係唔鍾意佢,只係婆婆即淘媽比我緊張n倍,隻B喊吓佢都要抱,我瞓著咗的話係唔會因為BB哼幾聲而醒。除咗開頭幾日驚佢卒死外,而家發現BB其實生命力幾強,食吓奶樽食吓人奶都唔會有混淆(只係講緊雞髀仔啫),雖然仁安d姑娘都講過,其實唔易混淆,只要餓乜都食,不過佢話多數媽咪緊張會就BB換奶嘴咁啫。佢日日係咁嘔係咁食咪又係大得好快,睇住d手手腳腳大隻咗。所以深夜餵奶掃風時我都係掛住睇pptv或者玩緊game而唔係長期望實佢塊面,哈哈。同埋BBo既屎係臭o既,唔係「得意」o既,薯一見換片就彈開九丈遠。諗落100%我做曬o既係同佢沖涼同餵人奶,接近100%係換片,薯換過一次。其餘食奶掃風婆婆舅父都有幫手,公公就包我每日伙食。

雞髀仔好多表情,但額高又濶似爸爸,頭髮少少搞到好似地中海咁,有時成個亞伯樣。嘴同下巴似我多d,下巴短唔靚,唔知大個會唔會好d lu,似我就慘。眼睫毛同眼眉毛越嚟越多,希望似爸爸啦。佢暫時每日工作就係食、吐奶、瞓、疴同喊、不過唔屬於扭計一族,只要夠飽同冇啖氣頂住,佢係可以好獨立咁瞓倒3、4個鐘。或者好快可以一教瞓天光。

開頭諗住坐一個月就返屋企,但而家發覺都係有人幫手舒服d,所以各位要探我o既朋友我會1月先約。雞髀仔2月起就會入日間托兒所,公司好好俾我早返早放去接佢,可以暫時唔使受工人氣住。總之暫時都係「我要做好呢份工」,雞髀滿月快樂,希望你一日好漺過一日,快d識行識走啦。仲有個客觀問題,薯同雞髀仔跌落海,梗係救雞髀仔先啦,薯可以捱多幾分鐘ahma。:p

雞髀仔滿月喇 有 “ 8 則迴響 ”

  1. Bruce can swim foe few minutes, don’t worry.
    and if both of them fall into water, definitely Bruce’s fault, let him pay for it. XD

  2. 哈哈,真係唔講都唔知雞脾仔滿月添,時間過得好快! 佢個樣變左好多,依家靚仔啲! cute啲! 你都分析得幾啱,佢有部份似爸爸,部份似媽媽,加埋就係靚仔一個! 雞脾仔滿月快樂! 比心機湊大佢! 😀

  3. 好靚仔喎,恭喜!最緊要健康長大!

    頭半年都會比較辛苦,到BB大D,減餐數、瞓長D就會輕鬆D喇。

  4. sang:哈,個問題係近排同同事玩開。
    hev:我返咗呀媽度坐月。
    roy:其實佢好大食,所以先嘔。
    Jenny,lichufai:大咗先知靚唔靚,而家最緊要佢唔嘔就好。

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s