青山走犯大行動2018回顧


MAP 2018

小弟尋日約左幾個朋友由屯門碼頭行路去沙頭角,多謝大家留言支持(包括北區group好多素未謀面既街坊)。今日,趁身體回復正常,寫篇長文,抒發下感受。

6_2018

走犯前後總共玩了四次,上次由尖沙咀行路去落馬洲,當時回響都幾大,有幾間報館轉載,01仲搵我訪問,講下點解要咁痴線。好多朋友都問我為乜咁做,有咩大目標?點解唔玩盡啲,參加毅行?

5_2018

先答第一個問題。其實無架,唔似得跑超馬玩毅行,係為左挑戰人類(自己)極限。我搞既青山走犯,無咁遠大既理想,甚至無一個清晰而單一既目標,相反,係由無數小目標組成,主要如下:

1. 呃like(實不相瞞)
2. 自殺式減肥
3. 唔行唔知身體好
4. 重拾那些年尋幽探秘既童趣
5. 工作苦悶,想比啲挑戰自己
6. 約老友食飯聚舊年頭約到年尾都約唔到,不如玩大佢,引蛇出洞
7. 住係香港咁多年,原來有好多地方無去過
8. 發展巨輪停不了,有啲地方你而家唔睇,將來想睇都無得你睇

2_2018

輪到第二個問題:點解唔玩毅行?那不是更富挑戰性、更自殺式減肥、更新奇刺激過癮嗎?

其實小弟有行山習慣,大刀屻、雞公嶺視若等閒,但毅行真係無諗過,因為太辛苦,比賽11月舉行,提前半年備戰,即係成個夏天都要操山,我怕熱,更怕傷身,行山只求欣賞風景過下日晨兼順便鍛練下身體,毅行呢家野唔啱我!

3_2018

退一步講,就算我有心玩毅行,去邊度搵腳?我啲朋友十個有九個都唔行山,我一黎就叫佢地玩毅行,預早半年特訓,我肯定個個都怕左我,要同我割蓆絕交。

於是,我諗左呢個減辡版毅行,路程減半,大約50公里,由香港既一邊行去另一邊,主要係平路、村路,另加小量山路,都只不過係家樂徑既級數,老少咸宜。雖然我每次係FB開post招人,朋友第一個反應都係:「嘩,你痴L線架,玩啲咁既野?」但第二個反應可能係:「會唔會……其實……我都有可能行到?」

9_2018

我點知佢地有呢個反應?因為我好幾次和朋友見面,佢地都主動問我走犯既事(唔係我主動提起),話:「我有諗過報名架,但咁啱果日有事……」「終於等到你今次走犯經過我屋企,最衰我唔得閒……」「我有興趣!等我同老婆大人申請假釋先……(然後無回音)」

佢地原本無必要同我交代,但仍然咁講,有理由相信,佢地係有諗過join,只係因為種種因素而作罷。雖然係咁,每次走犯都有新朋友加入,由第一次最少既四人同行,到最多果次有十幾人(果次亦係最失敗既一次,因為我生水泡,劇痛難忍,最後以領隊身份中途取消活動),我就覺得,我既策略係正確既,即係諗一個表面上好似好瘋狂既玩意,但諗深一層,又發覺似乎係achievable,而且唔使花時間準備,毋須經驗,男女不拘,只要有手有腳,體格正常,就可以報名參加,得就得,唔得就中途退出,無損失既。

1_2018

當你厭倦左放假唔知做乜,出街無野好行,戲院無新戲上畫,食飯唔想排隊,我就同你講,不如係一年365日裡面,搵一日大家一齊拋妻棄子,出黎由朝行到晚,睇下風景吹下水,你當係聚舊又好、應酬又好、挑戰又好、散心又好,總之大家各有不同動機,卻向同一目標進發。玩完覺得OK,下年再join,唔OK既,再見亦是朋友。

言歸正傳(sorry,「前言」有啲長)。今次走犯,算係四次走犯中最成功既一次,但亦係最辛苦既一次,因為全球暖化,厄爾尼諾,走犯當日艷陽高照,氣溫(體感溫度?)高達30度,全程無遮擋,硬食,慶幸濕度不算高,否則更難捱。今次亦是第一次有女士(和她老公)挑戰全程,唔簡單呀,佢過左元朗都仲係著住件風褸,而我已經熱到想裸跑……。

10_2018

一開波有5個人,另有一人係青山醫院join。既曰青山走犯,難得路經屯門,自然要去發源地青山醫院打卡朝聖。其中一位隊友身體抱恙,仍堅持依約赴會,令人感動。期間與他閒談,得悉一件不幸消息,感同身受,衷心希望問題最終可以解決。對了,這也是走犯的意義所在,成日流流長,有足夠時間比大家分享近況,互相關心,一方有難,八方支援。最後,該隊友因體力不繼,中途退出(以他當日的狀態,行到那裡已經很厲害,如果係我,可能已經call左白車),無法齊腳完成,可謂昨日最大的美中不足。

還有一件關於他的事我想講,走犯得以持續舉辦至今,他功不可沒,因為他是三年前第一次走犯的第一個報名者,當時我預左無人報名(正常!),純粹搏一搏,二人成團,否則取消。他「自投羅網」,令我大喜過望,亦證明左呢個世界,癲佬唔止我一個。

講番尋日。之前三次走犯,均採取前快後慢的策略,上午爭取時間給下午休息,但今次一改策略,全程均速,以致上午嚴重超時,最多比預計慢兩個鐘!幸好下午預得比較鬆動,追回不少時間。

11_2018

路線方面,我刻意避開青山公路的廢氣,由元朗起,以迂迴方式先入錦田河,經錦繡入牛譚尾村,路經新田軍營,再沿風光明媚的新田村路往落馬州,吃了一頓不過不失的午餐,再沿同樣風景優美的邊境路向羅湖進發,上華山,正值日落,晚霞初現,山路行了一半已全黑,夜行是另類體驗,講鬼故是指定動作,正!落山後接沙頭角公路,愈入愈僻靜,體力亦下降得愈快。腳再痛,也不及屎忽痛,因為屁股兩團肉磨擦了一整天,磨到損晒(反而十隻腳趾預先包膠,逃過一劫),痛到連步姿也受影響,唔講人地仲以為我生痔瘡。

呢個時候,隊伍分開前後,兩夫婦一馬當先,走犯順便談情,我地三人墮後,一個屎忽痛,一個腳板痛,一個周身痛。三個老野行到面無人色,跟附近的環境十分配合。兩夫婦愈行愈精神,女士更邊行邊跑,聲稱可以拉鬆肌肉,我才不信,我怕屁股磨到見骨!那位女士是是巾幗英雄,也是沙頭角人,可能家在眼前,行得寧舍興奮。我地三人則沉默是金,她反過來鼓勵我地,快啦快啦,終點在望,明明我才是領隊……無所謂啦,最緊要行到終點,不忘打卡留念,呢張卡,有血有肉,唔打對唔住自己呢!

7_2018

最後我想講。香港雖小,其實仲有好多有趣的地方等你我去發掘,把每個地方都行一遍,睇一次,即使他日香港面目全非,還可讓記憶長留心中。呢個就係我所謂的:青─山─精─神,共勉之!

又最後,下年暫定由屯門碼頭行去西貢碼頭,中午在深井食燒鵝,夜晚在西貢食海鮮,走犯食好西,約定你!

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google+ photo

您的留言將使用 Google+ 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s