18年8月14日白神山地及蘋果公園


8月14日,朝早起身自然係醫肚,相信青森市其實唔多酒店有比較大型嘅早餐buffet。


選擇都ok,雖然唔算話好多款。之後睇返佢哋好多自家製醬料或配菜,總括係每款都幾好味。


兼且有曬證書,主廚高橋寿幸仲係青森食命人咁話,畀你食之餘仲關心食品安全,你嘅健康等等。


然後先到酒店行兩分鐘到嘅ニッポンレンタカー 青森駅前攞車,改為1300cc,驚行山路太慢。好普通嘅日產5人車喺好好天氣底下~


大家已經習慣雞髀係人肉佈景版,:) 10點到白神山地(1993年同屋久島一樣為日本首次被登錄自然遺產,好大,仲有出產強發酵力有特別風味嘅白神酵母,森林步道內生長著完全不受人為影響,樹齡超過200年的大山毛櫸)其中一個白神之森遊山道遊山。呢個設施畀人入山前登記,跟住會畀個牌仔你,我諗佢每日收山前會登記返有冇邊啲人未返要入去搵。


仲有行山棍(斷估都係山毛櫸木,好輕身好硬淨)同紙扇(驅蚊蟲)供借用,明明帶咗蚊怕水嚟,但又唔記得放咗入喼冇拎出嚟用。


入面好易行,行幾次「山」都發覺日本啲山路係舖排好曬,冇香港啲咁原始,比較有主題公園feel,但又確係較適合小朋友。有好多唔同種類植物呀、菇,雀仔聲多蟬聲多,但真身就少見,可能我哋唔係真係咁多時間慢慢捕佢。全程空氣好新鮮,唔算太熱但就真係勁多蚊,追到我行得好快。


兼且真係有熊出沒的。


全程都好舒服,好青色森林。


行完自然就係又係賣店,呢個設施冇餐廳,不過都唔會冇嘢賣。


又買咗枝棍、毛公仔同埋個好好聽嘅鈴鐺。


走馬看花行個零鐘就出發去弘前,途經好多人排隊嘅農園,乜事呢?入去望望,應該係青森岩木山高原一帶特產嶽きみ粟米,難怪咁多人揸車嚟買,唔執輸買咗幾條煮熟嘅,甜度比超甜粟米仲要高,必試,薯食完要再翻兜。佢繼續做最愛做嘅事,買生果、拎生果同埋食生果嘅頭兩步曲,我只愛第三步。青森嘅蜜瓜,名不經傳,但有料到,CP值高。相比之下,有名嘅蘋果好食同難食之間冇日本瓜同其他地區產蜜瓜果個差別咁大。


好快去到弘前蘋果公園,呢個係toilet嚟。


真身是咁的~


呢隻有蘋果嘅郵筒係青森周圍都有架,唔係呢度獨家。


未摘得蘋果,先光顧蘋果產品。


試飲カネショウ蘋果醋好好味,但太重又唔想宅急便,買咗最左手邊獨立包裝嘅算。睇返網站原來就係用白神酵母加木桶釀造,正!


呢位金仔係中朝混血,佢問「我可以說中文嗎?」,咁你講啦,唔通同我講北朝鮮話咩,HAHA。btw佢態度係好nice,不過有日本人嘅死板同中國人嘅少少求其。
事緣係咁嘅,蘋果摘到先畀錢買,其實呢度呢蘋果唔係特別好食,冇JAL CITY啲果汁咁甜,斷個買,5個376 yen,我以為冇咪畀380yen,點知cashier一打完我就搵到6yen,但對方話打咗單堅持要找我4YEN,…一個高級少少埋嚟叫對VOID單再改,我唔想為難佢咪拎返10YEN出嚟算,冇所謂。忍唔住同金仔講10找4同6咪一樣,而家佢收完376,再收10找4,咪錯咗,佢得個笑字。我問你部收銀機最尾多咗6yen有冇問題架,佢又話OK嘅,咁就算了。ANY肥,聽到佢話呢度好少大陸團,反而台灣人同港人較多,未淪陷都係好消息。


蘋果唔係向下摘,係向上托嘅,咁先有柄。

好,下篇再續~

20180812-13 香港至青森日記


事前準備係藍十字,今年保費貴咗啲。8月12日下午4點零鐘到機場Terminal 1 接機大堂A16 counter攞WIFIBB蛋,點解用佢,純粹鍾意試嘢。今次減到137蚊10日,so far so good,掋玩。不過論方便,始終用sim卡好,唔使又多樣重嘢又要叉電又要按金1K,下次會試自由鳥遨遊SIM


正想話wifibb個map其實唔太清楚,去到都要搵,諗住搵個香港機場map方便大家,唔搵尤自可,一搵真係把幾火,要幾難睇有幾難睇,紅圈位置我估係啦吓,有錯唔好打面。


時間尚早,自然去lounge觀光一吓,話說我拎住張priority pass幾年都冇乜點用,呢個喺terminal 2嘅lounge係第一次。


然後估唔到咁啱撞到同學仔嚟開機場~


坐UO622 18:05 香港 至23:15 羽田,自然地delay你啦,hkexpress app係冇提的,只有機場app有。(另,hkexpress web page做唔到online checkin,唔知點解,但佢個app又可以,跟住發現有做internet checkin條隊短好多好多,而且快好多~)


又係遠到喊嘅202出發,不過雞髀仔開心,亞媽就開心~


唔知佢delay,事先叫咗2個焗豬扒飯,1個牛肉飯,係size細少少,味道出奇地唔差。


用嘅係HK Express U-FLY,估佢實DELAY架喇,諗住懶醒book機場入面酒店,點知低b的我冇諗清楚,第一次羽田落機,book咗國內機terminal 2 間東急excel,之後自然要等shuttle轉返去國際幢。人行要30分鐘呀,唔好學我咁豬兜,要BOOK都要ROYAL PARK呀。豬兜的事陸續有來~


睇乜都冇用,去到都成點,乜SHUTTLE都冇曬。


唔講唔知,以往的士明明600-660起跳,上車竟然490,司機話年半前左右只係減個minimum,過咗個費用就不變,最後搭咗2250YEN由國際幢搭返去酒店。


酒店正常開到喼,補眠一陣冇要求。

8月13日

由於飛機又冇JR PASS咁掋,但佢預約席又低B地只能早一晚9:00PM前人肉出現去攞飛,咁結果就梗係要一朝早去排隊。而國內機TERMINAL 2係冇得換PASS的,又要搭返shuttle bus去國際幢喇。然後…


開6:45AM,7點到已排長龍,條隊企10分鐘都冇郁過,仲寫明只能換PASS,不能BOOK車位,建議你搭去MONORAIL總站浜松町就可以訂埋預約席云云(留意JR PASS包埋MONORAIL的,咁而家就要自費位位490搭去浜松町)


懶得又排多次隊,於是自費…7:35左右去到就發現佢係開8:00AM嘅,HOMEPAGE有講,但我本來冇諗住喺度換嘛。咁咪再自費搭去東京站,山手線啫,3條友比多幾百YEN好過咁遲。


終於到,東京站人都唔少,諗住又瀨嘢,但好在效率唔低,我哋趕到JR東北新幹線 はやぶさ5号 新函館北斗行(8:20am),只可惜遇啱8月13日-19日的お盆,全日FULL咗只可以企位。


正式悶到抽筋…係悶到拉筋,車上有嘢食嘢飲醫肚有廁所。


連呢啲都影?係,資訊是我的賣點,哈哈。


到喇,早排係睡魔祭,所以周圍都係呢啲嘢~


日航酒店放低嘢,跟住仲有時間。


補:日航酒店啲guide booklet其實做得幾靚幾唔錯,禽日睇返酒店外面呢舊嘢,原來係1984年青森嘅水喉水係全國最好飲攞奬,德國雕塑家Gerd Knapper造嘅紀念碑。(入面仲有介紹歷史、輕津工藝等,我哋呢啲淺度急行遊~哈哈)


行經物產館,去車站食嘢。


睡魔之家


好一般~


食完喺青森站訂埋之後嘅指定席,有得坐喇。


跟住搭青い森鉄道去浅虫溫泉站嘅浅虫水族館,係個好偏僻嘅地方,唔好以為有條溫泉大街。


買咗3館共通券~


水族館比想像中嚟計都唔算細同幾多嘢睇,又有採珠體驗同好近睇到海豚。


大概4點回程,鄉郊嘅風景~


青森車站又唔少歷史照片。


跟著梗係忍唔住試蘋果批。


蘋果,周圍都係蘋果。


八甲田丸係架退役嘅青(森)函(館)連絡船


入面有好多嘢睇,包括重現百幾年前嘅青森市場嘅模型


同埋成架船都係參觀部份


甲板風景~


然後再去返アスパム青森物產館,一次過買咗萬幾YEN手信,點知回港都好似唔多夠,要去樂天補貨。頂層自然又係360度觀景台。


本來諗住喺度食埋有景飯,薯自然唔like又魚又海鮮嘅鄉土料理,於是去返連鎖店山內農場。估唔到最好食係麵屎同青瓜。


比起雞,呢個都好味,但香港嘅蠔餅更好味。

好眼瞓,返酒店,房間冇特別冇影,都有3張床唔算細的。

人間白老鼠之EMS Training@BodyExpress

由於越嚟越肥,頂自己唔順,咪google吓personal trainer諗住做返運動。
上上星期走咗上BodyExpress試玩,wow,覺得好掂呀。

首先,咩係EMS training?自己睇
quote佢:
原理
最初 EMS (脈衝電流刺激訓練)被 NASA 運用在太空人進行太空探索時的肌肉訓練,在無重力環境下,肌力相對流失更快,必須透過高科技強化肌肉。
模擬人體大腦生物電信號,將信號級中低頻率脈衝電流通過汗腺導入技術傳輸到運動神經。
調節肌肉收縮強度 、時間和規律等,指揮同組肌肉群協同工作。
發展肌肉力量。
幫助改善肌肉軟組織傷病。
減脂塑型。」

咩掂?先嚟做過分析…唉唉唉:我屋企個Tanita脂肪磅長期冇偷懶,一直話我知我脂肪比率已達恐龍級數,今次更加事實擺在眼前:

慶幸仲合格,但年紀大機器壞,瑜伽又就唔到時間,近來先每日做幾分鐘plank。肌肉流失啦,脂肪積聚啦,我連BEFORE AFTER果張BEFORE相都唔想影上嚟,必須減fat操肌肉,練到馬甲線再post。

另,muscle-fat analysis 我而家係C,希望練到D,即增加肌肉減少脂肪。

咁能夠斷症啫,係咪可以下藥呢?
同網上睇嘅一樣,要除曬衫包括內衣褲換咗佢套黑色Trek Suit,再著件濆濕水通電外套,企上部機學Basic Squat,我真係做過瑜伽連無影凳都坐唔好。

部機可獨立調校每個位置電流:


小鮮肉靚仔教練(佢嘅身體分析攞成90分,體脂肪得11%)就按照最基本呢啲動作,不斷教同鼓勵我做(其實係虐待…佢好啱做)。電流嚟4秒停4秒,感覺似睇龍珠果啲重力訓練,幾分鐘開始索氣,流汗,然後肌肉一如佢所講痛咗3日。由於網上睇研究話train muscle快見效又近office,啱我呢啲要返屋企同仔做功課,又join咗。(基本上我好易Sell,而佢哋直頭唔Sell,Nice。)

今次再裝埋呢個MY NET DIARY控制卡路里吸收。上星期五去第二次,之後book定routine一星期兩次。教練講過,就算唔講都知,齋train muscle唔控制diet唔會瘦,今朝磅重,輕咗係預料之內,竟然連脂肪比率都下降埋(都唔知幾耐冇見過…),實在太滾動喇 TT,(wordpress點解冇EMOJI)希望今次唔好三分鐘熱度啦。(衰格地畀咗錢係好啲!)